Bakıda tanışını qətlə yetirməkdə təqsirləndirilən İlqar İsmayılovun məhkəmə prosesi başa çatıb. Bu haqda bu gün, 8 iyun tarixində APA məlumat verib.
Hakim Samir Əliyevin icraatında olan cinayət işi üzrə prosesin hökmünə əsasən, İsmayılov 18 il müddətinə azadlıqdan məhrum edilib.
Sabunçu rayonunda 2021-ci il sentyabrın 15-də İlqar İsmayılov 30 yaşlı Cabir Abulovla mübahisə edib, daha sonra isə onu bıçaqlayıb. Yaralı xəstəxanaya çatdırılsa da, onun həyatını xilas etmək mümkün olmayıb.
Faktla bağlı İsmayılova qarşı Cinayət Məcəlləsinin “Qəsdən adam öldürmə” maddəsi ilə cinayət işi başlanılıb.
Bakı Ağır Cinayətlər Məhkəməsində keçirilən prosesdə İlqar İsmayılov Cabir Abulovu öldürmədiyini deyib. Zərərçəkmişin hüquqi varisi Şəmsi Abulov da təqsirləndirilən şəxsin dediklərini təsdiqləyib. O, qardaşının İ.İsmayılov tərəfindən öldürülmədiyini söyləyib.
