Sabunçu rayonu, Nikolay Baybakov küçəsində (3 nömrəli xəstəxana ilə üzbəüz bina) aparılan söküntü işləri ciddi narazılıq doğurub.
Bu barədə Bakuplus.az-a yerli sakinlər məlumat veriblər.
Sakinlərin dediyinə görə, binanın söküntüsünə dörd il əvvəl başlanılıb. Həmin vaxt sakinlərə vəd olunub ki, bu ərazidə yeni yaşayış binası inşa ediləcək. Lakin ötən müddət ərzində vəziyyət kritik həddə çatıb.
Şikayətçilər bildirirlər ki, ikimərtəbli binanın yuxarı hissəsi tamamilə dağıdılıb: mərtəbələr sökülüb, pilləkənlər məhv edilib. Sakinlərin bir qismi məcbur qalaraq evlərini tərk edib və kirayə mənzillərə köçüb. Lakin insanlara nə yeni mənzil verilib, nə də tam həcmdə kompensasiya ödənilib.
Sakinlərin sözlərinə görə, bir müddət kirayə haqqı yeni binanı tikməli olduğu bildirilən "Almond" tikinti şirkəti tərəfindən qarşılanıb. Daha sonra ödənişləri başqa bir şirkət həyata keçirməyə başlayıb: "Görünür, podratçı dəyişdirilib, lakin sakinlərə indiyədək layihəyə hazırda hansı şirkətin cavabdeh olduğu və ümumiyyətlə, tikintinin həyata keçirilib-keçirilməyəcəyi barədə heç bir rəsmi məlumat verilməyib".
Hazırda yarıuçuq vəziyyətdə olan binada 12 ailə yaşayır, bu isə onların hər biri üçün təhlükəlidir.
Şikayətçilər deyirlər ki, bu ərazi antisanitar vəziyyətə düşüb: mərkəzi yol palçıq içindədir, dağıntılar arasında evsiz şəxslər gecələyir.
Sakinlər Sabunçu Rayon İcra Hakimiyyətinə dəfələrlə şikayət etsələr də, ortada nəticə yoxdur.
"Artıq dörd ildir ki, biz dağıdılmış binada, çirkab və daimi qorxu içində yaşayırıq. Sabah bizi nə gözlədiyini bilmirik. Müvafiq qurumlardan xahiş edirik ki, yaranmış vəziyyətə diqqət yetirsinlər" – deyə şikayətçilərdən biri vurğulayıb.
Məsələ ilə bağlı Sabunçu rayon İcra Hakimiyyətinə sorğu göndərilib.
