Ekologiya və Təbii Sərvətlər Nazirliyi Bakı şəhərinin bəzi ərazilərində yayılan qoxunun səbəbini araşdırmağa başlayıb.
Nazirlikdən BakuPlus.az-a bildirilib ki, bu məqsədlə monitorinq qrupları yaradılıb. Hazırda qruplar tərəfindən monitorinq və araşdırmalar aparılır.
***
13:00
Sosial şəbəkələrdə son günlər paytaxt ərazisində kəskin qoxunun olduğu ilə bağlı məlumatlar yayılıb. Bu qoxunun səbəbi kimi müxtəlif amillər ehtimal edilir.
Bəs görəsən, bu qoxunun səbəbi nədir?
Mövzu ilə bağlı BakuPlus.az Milli Ekoloji Proqnozlaşdırma Mərkəzinin rəhbəri, ekoloq Telman Zeynalov ilə əlaqə saxlayıb. O qeyd edib ki, qoxunun əsas səbəbi tullantılardır:
“Bakıda minlərlə qeyri-qanuni zibilxanalar var. Onlar ləğv olunmalıdır. Son günlər yayılan kəskin qoxu da elə həmin yaranan zibilliklərlə əlaqəlidir. Zibili kanalizasiyalara da tullayırlar. Ümumi olaraq bu kimi tullantılar çürüyür və metan qazı yaradır. Hər yer də çirklənir.
İnsanlar zibilləri hara gəldi atırlar. Sonra da şikayət edirlər. Yaranan qoxunun əsas səbəbi qalıqların çürüməsidir”.
Nəzrin Vahid
