Zaman-zaman paytaxtın müxtəlif ərazilərindən Təcili Tibbi Yardımla bağlı şikayətlər gündəmə gəlir. Bu dəfə isə Masazır qəsəbəsi şikayətin mənbəyi olub.
Bakuplus.az xəbər verir ki, bu barədə şikayət sosial şəbəkədə paylaşılıb.
Belə ki, Masazır qəsəbəsində yaşayan sakin təcili tibbi yardım çağırıb. Onun çağırışına 2 saat sonra cavab verilib. Həmin müddət ərzində isə operator bu əraziyə 3 həkimin təhkim edildiyini və bütün briqadaların çağırışda olduğunu deyib.
Məsələ ilə bağlı Bakuplus.az TƏBİB-ə sorğu ünvanlayıb. Sorğuda deyilir:
“Hazırda Masazır qəsəbəsində məskunlaşan (qeydiyyatda olan) əhaliyə 3 təcili tibbi yardım briqadası xidmət göstərir və orta hesabla bir sutka ərzində bu qəsəbədə məskunlaşan əhalidən 60–70 dən çox müraciət qeydə alınır. Çağırışların sayını, bir briqadaya düşən yükü, yol infrastrukturunun vəziyyətini, tıxacları və çağırış ünvanlarının tapılmasında yaranan çətinlikləri nəzərə alaraq müraciətlərin daha çox daxil olduğu saatlarda çağırışların icra edilməsində gecikmələr yarana bilir.
Qeyd edək ki, bütün bunları nəzərə alaraq Sumqayıt və Xırdalan ərazisi üzrə yeni təcili tibbi yardım filiallarının açılması nəzərdə tutulur. Yeni filialın yaradılması çağırışların vaxtında icrasına kömək edəcək.
Məlumat üçün bildirək ki, çağırışların daha səmərəli idarə edilməsi məqsədilə müraciətlərin çeşidləməsi həyata keçirilir və bunun nəticəsində təcili müdaxiləni tələb edən çağırışlar (yol nəqliyyat hadisələri, yanğın, kütləvi xəsarətlər, uşaqlarda qıcolmalar və s.) ilk növbədə icra üçün yönləndirilir. Yaranan gecikmələrin əksəriyyəti təxirəsalınmaz hallarla (bədən hərarətinin yüksəlməsi, baş ağrısı və s. kimi) bağlı olur.
Həmçinin, gecikmələrin aradan qaldırılması məqsədilə müraciətlərin daha çox daxil olduğu saatlarda və zərurət yarandığı hallarda yaxınlıqdakı bölmələrdən (Sumqayıt və Abşeron Təcili və təxirəsalınmaz tibbi yardım bölmələrindən) təcili yardım briqadaları da Masazır qəsəbəsi üzrə çağırışlara cəlb olunur”.
Fidan İlqar
