Yaz fəslinin ilk ayındayıq. Hər zaman olduğu kimi havaların isinməsi ilə turizm sektorunda da canlanma müşahidə olunur.
Bəs, görəsən, ölkəyə gələn turistlərin sayında hansı dəyişikliklər baş verib? Turistlər daha çox hansı bölgələrə üz tutacaqlar? Daxili turizmə müraciət edənlər daha çoxdur, yoxsa xarici?
Mövzu ilə bağlı Bakuplus.az-a açıqlama verən turizm eksperti Cabir Dövlətzadənin sözlərinə görə, müştəri artımı artıq yavaş-yavaş hiss olunur:
“Artıq qış mövsümü bitmək üzrədir. Bu vaxtlarda mərkəzi hotellərdə müştəri çox azalır. Yazın gəlişi ilə artıq orta mövsüm deyə biləcəyimiz bir mövsüm başlayır. Bu, yüksək və zəif mövsümlər arasındadır.
Ümumiyyətlə Azərbaycan bazarına son vaxtlar daha çox Hindistandan axın gəlməkdədir. Qrup halında gəlib, adətən böyük hotellərdə qalırlar, bir qismi də evlərdə qonaqlayır. Regionlarımıza isə, əsasən də Şahdağa, onların müəyyən bir hissəsi gedir”.
C.Dövlətzadə qeyd edib ki, saylarına görə türk müştərilər ruslardan sonra ikinci yeri tuturlar:
“Hindistan, Koreya və Çindən əlavə digər ölkələrin turistlərində də müəyyən bir artım olacaq. Təqdirəlayiq və sevindirici haldır ki, türk müştərilər ruslardan sonra ikinci yeri tuturlar. Artıq onlar Avropa ölkələrindən çox Azərbaycanı kəşf etməyə üstünlük verirlər”.
Ekspert Ceyhun Aşurov isə qeyd edib ki, turizm sektorunda hazırda durğunluqdur:
“Ramazan ayıdır. Buna görə xaricdən, xüsusən ərəb ölkələrindən gələn turistlərin sayında azalma var. Amma Hindistan, Pakistan və Avropa ölkələrindən turistlər az-az gəlir. Daha çox turist böyük tədbirlər və yaxud da ümumi tətil olanda müşahidə olunur. Bayram yaxınlaşır. İnsanlarımız ardıcıl istirahət edəcək. Rayonlar və ölkə xaricinə üz tutmaq istəyən insanlar var. Bunu sosial şəbəkələrdə və turizm şirkətlərinin reklamlarında da görə bilərik. Rusiya, Türkiyə, Gürcüstan, Dubay, Doha ilə paralel olaraq biz Misir, Maldiv adaları, Şri-Lanka, Uzaq Şərq və Orta Asiya ölkələrinin reklamlarını da görə bilirik. Əlbəttə ki, qiymətlər fərqlidir. Daxili turizmdə də müəyyən qədər tələbatın artacağı gözlənilir”.
Nəzrin Vahid
