Bu ilin noyabr ayında Bakıda Birləşmiş Millətlər Təşkilatının İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) keçiriləcək. Bu konfrans iqlim dəyişikliyi ilə mübarizə və qlobal istiləşmə məsələlərinin müzakirəsi üçün əhəmiyyətli bir platformadır. Tərəf ölkələr, qeyri-hökumət təşkilatları, mütəxəssislər və ictimaiyyət nümayəndələri burada iqlim siyasətlərini, karbon emissiyalarının azaldılması və davamlı inkişaf istiqamətində fikirlərini paylaşacaqlar. Konfrans iqlim fəaliyyəti üçün yeni maliyyə mexanizmləri də formalaşdırır.
Bəs görəsən, bu mexanizmlərin formalaşmasının nə kimi təsirləri olacaq?
Mövzu ilə bağlı BakuPlus.az-a açıqlama verən Milli Məclisin deputatı Vüqar Bayramovun sözlərinə görə, COP hədəflərinin reallaşdırılması bu istiqamətdə daha çox vəsait cəlb edilməsini aktuallaşdırır:
“İqlim dəyişikliyinə qarşı mübarizədə dövlətlərin həm də maliyyə öhdəliklərinin formalaşması vacibdir. Bu baxımdan Bakının yanaşması mövcud çağırışlara uyğundur. Praktik olaraq iqlim dəyişikliyi üçün maliyyənin artırılması preventiv xarakter daşıyır. Çünki bu qlobal problemlərin öncədən qarşısının alınması və bu istiqamətdə daha çox vəsaitin yönəldilməsinə imkan yarada bilər.
Bakının təşəbbüsü pozitivdir. Yüksək qiymətləndirilməlidir. Təşəbbüsün mahiyyəti bütövlükdə iqlim maliyyəsi sahəsində bütün səylərin mobilizasiyasına nail olmaq və bu istiqamətdə səyləri birləşdirməkdən ibarətdir. Bu kontekstdən də inkişaf etmiş ölkələrin bu təşəbbüsü daha yaxından dəstəkləməsi bütövlükdə iqlim dəyişikliyinə qarşı mübarizənin sistemliyini artıra bilər”.
Almaz Qasımova
