Bakı şəhərində velosiped və skuter istifadəçilərinin sayı artıb, lakin bu, həm təhlükəsizlik, həm də yol qaydalarına əməl etmək məsələlərində yeni çətinliklər yaradıb. Yol hərəkəti qaydalarını pozan və təhlükəsizliyə riayət etməyən velosipedçilər və skuter sürücüləri cərimələnə bilər.
Ekspertlər bildirirlər ki, velosipedlər və skuterlər yalnız xüsusi zolaqlarda hərəkət etməlidir. Əgər belə zolaqlar yoxdursa, avtobus zolağında hərəkət etmələri tövsiyə olunur. Avtomobil yoluna çıxmaq, xüsusən sıx yollarda, qəza riskini artırır. Hər hansı bir təhlükəsizlik qaydasını pozan sürücülərə 40 manat cərimə tətbiq oluna bilər.
Məsələ ilə bağlı Trend-ə açıqlamasında nəqliyyat məsələləri üzrə ekspert Ərşad Hüseynov bildirib ki, qanunlarda velosiped və skuterlərin avtobus zolağında hərəkəti ilə bağlı qeyri-müəyyənlik mövcuddur. Nəqliyyat məsələləri üzrə ekspert Rauf Ağamirzəyev isə velosiped və skuter üçün ayrıca zolaq şəbəkəsinin tamamlanmasını vacib hesab edir:
"Bu zolaq kəsintisiz olmalı və zəbt edilməməlidir. Hazırda paytaxtda kifayət qədər belə faktlar var. Bu nəqliyyat vasitələrinin yol şəbəkəsi müəyyən bir ərazini əhatə edirsə və təyin olunan zolaqlardan kənara çıxarsa, o zaman cərimə olunacaq. Belə halda cərimə tətbiq edilməsi ədalətsiz yanaşmadır. Zolaq olmadığından bu nəqliyyat vasitələri məcburən avtomobil yollarına çıxırlar".
