1992-ci il fevralın 25-dən 26-na keçən gecə SSRİ-nin Xankəndi şəhərində yerləşdirilmiş 366-cı motoatıcı alayın heyəti və zirehli texnikasının köməkliyi ilə erməni silahlı birləşmələri Xocalı şəhərinə hücum ediblər.
Bakuplus.az məlumat verir ki, onların törətdiyi soyqırım 1988-ci ildən başlamış Ermənistan – Azərbaycan münaqişəsinin ən böyük faciəsi olub.
Xocalı faciəsi nəticəsində 613 nəfər qətlə yetirilib. Həlak olanların 63-ü uşaq, 106-sı qadın və 70-i qoca olub. 25 uşaq hər iki, 130 uşaq isə valideynlərindən birini itirib. Yaralıların sayı 487 nəfər, əsir götürülənlərin sayı isə 1275 nəfər idi.
8 azərbaycanlı ailəsi tamamilə məhv edilib. Həmin gün Xocalı yerlə-yeksan edilib və ermənilər tərəfindən işğal olunub.
Xocalı 19 sentyabr 2023-cü ildə aparılan lokal xarakterli antiterror əməliyyatları nəticəsində azad olunub. 15 oktyabrda Azərbaycan Respublikasının Prezidenti İlham Əliyev Xocalı şəhərində Azərbaycan Respublikasının Dövlət Bayrağını ucaldıb.
Qeyd edək ki, hazırda Xocalı şəhərində Xocalı Soyqırımı Memorial Kompleksi yaradılır. Dövlət başçısının Sərəncamı ilə bununla bağlı Mədəniyyət Nazirliyinə 18,3 milyon manat ayrılıb.
