Paytaxtın Binəqədi rayonunda ötən ildə baş verən dəhşətli qətl hadisəsinin bəzi təfərrüatları məlum olub.
Unikal.az xəbər verir ki, ittihama görə, Amin Nuri ilə eyni həyətdə yaşayan qardaşı Aslan Nuriyev arasında uzun müddətdir ciddi problem mövcud olub. Buna səbəb Aslanın narkotik vasitələrdən istifadə etməsi və tüfeyli həyat tərzi sürməsi olub. Amin bu vəziyyətdən narahat olduğu üçün dəfələrlə qardaşına eyni həyətdən istifadə etməmək üçün ayrı giriş qapısı qoymağı təklif etsə də, bu təklif qəbul edilməyib.
İyulun 2-də tərəflər arasında növbəti mübahisə baş verib və Aslan Nuriyev qardaşını, eləcə də onun ailə üzvlərini hədələyib. Bu hadisədən sonra qorxuya düşən Amin ertəsi gün – iyulun 3-də məsələni bir daha danışıb həll etmək məqsədilə qardaşının yaşadığı mənzilə gedib.
Lakin hadisə zamanı o, evdən götürdüyü bıçaqla qardaşına hücum edib. Aslan Nuriyev həmin vaxt narkotik təsiri altında çarpayıda uzanmış vəziyyətdə olub. Amin onu səsləsə də, cavab ala bilmədiyi üçün əsəbiləşib və nəticədə qardaşını onun 2 yaşlı qızının gözləri qarşısında çoxsaylı bıçaq zərbələri ilə qətlə yetirib.
Faktla bağlı Amin Nuri barəsində Azərbaycan Respublikası Cinayət Məcəlləsinin qəsdən adam öldürmə (xüsusi amansızlıqla və köməksiz vəziyyətdə olan şəxsi öldürmə) və digər maddələri ilə ittiham irəli sürülüb.
