Sərnişinlər 18 nömrəli marşrut xətti üzrə hərəkət edən avtobusların istiqamətlərini dəyişməsindən narazıdır.
Bu barədə Bakuplus.az-a sərnişinlərdən biri müraciət edib.
Şikayətçinin sözlərinə görə, qeyd olunan hadisə dəfələrlə baş verib:
“18 nömrəli avtobus metronun “Sahil” stansiyası tərəfdən gələn zaman Axundov bağı yaxınlığında yolunu qısaldır və üzü “Elmlər Akademiyası” metrostansiyası istiqamətində gedir. Halbuki, avtobus Əhməd Cavad küçəsindən keçib, oradakı dayanacaqda durmalı və daha sonra Axundov bağı tərəfə getməlidir. Avtobuslar yollarını qısaltdıqlarına görə isə çox vaxt o tərəfdə - həmin dayanacaqda sıxlıq yaranır”.
Sərnişin onu da qeyd edib ki, havalar isinsə də, sözügedən marşrut xəttində kondisioner sistemi çalışmır.
“30 dərəcədən çox temperaturun olmasına baxmayaraq, avtobus sürücüləri sərnişinlərə qarşı laqeyd yanaşır. Elə olur ki, gün ərzində 3 dəfə 18 nömrəli avtobusa minirəm. Heç birində kondisioner sisteminin işlədiyinin şahidi olmamışam”, - deyə şikayətçi bildirib.
