Natiq Tağıyev adına 212 nömrəli tam orta məktəbinin 7-ci sinif şagirdi Məmmədxan Markovun anası təhsil ocağının direktoru Sevil Cavadova tərəfindən hücuma məruz qaldığını bildirib.
Bununla bağlı valideyn Hüseynova İlahə Elman qızı bakues.az-a müraciət edib.
Şikayətçinin sözlərinə görə, hadisə 23 yanvar səhər saatlarında baş verib.
Belə ki, o, övladının sinif rəhbərinin çağırışı ilə bəzi müəllimlərin oğlundan şikayəti əsasında təhsil ocağına dəvət olunub. Dəhlizdə oğlunun sinif rəhbəri Nüşabə Qasımova ilə üzləşən valideyn şikayətçi tərəflərin iştirakı ilə direktorun otağında görüşmək istədiyini bildirib. Sinif rəhbəri vaxtının olmadığını və işlərinin çoxluğunu əsas gətirərək oradan uzaqlaşıb. Bundan sonra valideyn məktəbin direktoru Cavadova Sevil Eyvaz qızının otağına yaxınlaşıb.
Valideyn iddia edir ki, otaqdan çıxan direktor onun qolundan tutaraq səs-küy yaratmaqla onun sakitliyinə mane olduğunu bildirib və onu itələməyə başlayıb:
“Direktor daha sonra mühafizəçini çağıraraq məni itələyə-itələyə birlikdə məktəbdən çıxartdılar. Bundan sonra 102-ə zəng edərək direktor tərəfindən hücuma məruz qaldığımı bildirdim. Bunu eşidən direktor yenidən mühafizəçi ilə məktəbin həyətində mənə doğru gəldilər və məni vura-vura məktəbin həyətindən də çıxartdılar. Məktəb direktoru mənə hədə-qorxu gələrək “Məni başqa direktorlarla səhv salma” sözünü dedi. Məktəbdən çıxandan sonra 17-ci polis bölməsinə yaxınlaşaraq şikayət ərizəsi ilə müraciət etdim”.
Valideyn İlahə Hüseynov bildirib ki, oğlunun hiperaktiv olması və məktəbdə davranış qaydalarına əməl etməməsi ilə bağlı məktəbdən bir neçə dəfə ona şikayət edilib.
“Oğlum Markov Məmmədxan Alekseyeviç 212 nömrəli məktəbin 7-ci sinif şagirdidir. Mənim heç bir müəllim və valideynlə problemim olmayıb. Problemli valideyn olmadığıma görə sinif rəhbərinin məsləhətinə əməl edərək, uşağımı Neftçilər Xəstəxanasına apardım və həkim müayinəsindən keçdi. Həkim uşağımın sağlam olduğunu və dərman kimi yalnız “Valerian” yaza biləcəyini qeyd etdi. O, diaqnoz yazmaqdan imtina etdi. Mən həkimin cavabını sinif rəhbərinə atdım. Halbuki sinif rəhbəri həkimi diaqnoz yazmamaqda günahlandırdı”, – deyə Məmmədxanın anası qeyd edib.
Valideyn iddia edir ki, məktəb rəhbərliyi onun oğlunu məktəbdən çıxarmaq üçün bu cür qərəzli münasibət sərgiləyir.
Daha ətraflı videomaterialda:
