Abşeron rayonu, Xırdalan ərazisindən Masazır qəsəbəsi, “Yeni Bakı” yaşayış massivi istiqamətində hərəkət edən 517 nömrəli marşrut xəttindən şikayət var.
Bakuplus.az-a müraciət edən sakinlərin sözlərinə görə, sürücülər plan əsasında işlədikləri üçün kefləri istəyən qaydada hərəkət edirlər.
Məlumata görə, avtobus sürücüləri marşrutun hərəkət istiqamətini dəyişir və bir çox sərnişin bundan narazıdır.
“Sürücülər avtobusu istədikləri şəkildə idarə edir. Əslində bu marşrutun Masazır dairəsində dayanacağı var. Ancaq sürücülər həmin dayanacağa daxil olmur. Xırdalan qəbiristanlığının qarşısındakı dayanacaqdan sonra birbaşa Masazır körpüsü ilə hərəkət edirlər və bir də “Mətanət A” şirkətinin yanında saxlayırlar. Çox zaman isə Bakı-Sumqayıt şosesində qəza vəziyyəti yaradır, Masazır dairəsinə ayrılan yerdə saxlayır və ora getmək istəyən sərnişinləri düşürürlər. Sonuncuların haqlı narazılığı isə kobudluq və aqressiya ilə qarşılanır. Buna görə insanlar orada düşərək uzun yolu piyada getməli olurlar. Bu isə onların həyatı üçün ciddi təhlükə yaradır. Hər dəfə müraciət edirik. Ancaq şikayətimizə baxan yoxdur”, - deyə sakinlərdən biri bildirib.
Şikayətçilər bildirir ki, problem təkcə bununla da bitmir. Həmçinin sürücülər kiçik həcmli avtobuslara həddindən artıq sərnişin yığır:
“Balaca avtobusa nə qədər adam doldururlar! İnsanları qınamaq olmur. Hamı bilir ki, axşam 8-dən sonra avtobus tapmaq mümkün deyil. Buna görə insanlar məcburi də olsa avtobusa minib evlərinə çatmaq istəyirlər”.
