Bakıda yerləşən Elmi-Tədqiqat Mamalıq və Ginekologiya İnstitutunun (6 saylı Doğum Evi) adı daha bir qalmaqalla gündəmə gəlib. Əmirova Nərgiz adlı ana iddia edir ki, iyunun 24-də dünyaya gətirdiyi üç körpədən ikisi baxımsızlıqdan həyatını itirib.
Tribunainfo.az xəbər verir ki, ana qeysəriyyə əməliyyatı ilə doğuş həyata keçirmək üçün 2500 manat ödəniş edib. Əməliyyat Tənzilə Əliyeva adlı həkim tərəfindən icra olunub və üç oğlan körpə dünyaya gəlib.
Əmirovlar ailəsinin iddiasına görə, doğuşdan sonra uşaqların küvəzdə saxlanması üçün əlavə 5000 manat tələb olunub. Bu tələblə G.Məmmədzadə adlı həkim çıxış edib və ailəyə bildirilib ki, pul ödənilməsə, körpələr küvəzdən çıxarılacaq.
Ailə vəziyyətin kritikliyini nəzərə alaraq məbləği ödəyib. Lakin valideynlər bildirirlər ki, buna baxmayaraq uşaq həkimi Şəbnəm Qəhrəmanova tərəfindən iynə, dərman və digər ləvazimatlar adı ilə davamlı olaraq əlavə ödənişlər tələb olunub.
Ana Nərgiz Əmirovanın sözlərinə görə, iyulun 1-də körpələrdən biri, iyulun 7-də isə digəri dünyasını dəyişib. Valideynlər iddia edirlər ki, maddi imkanlarının tükənməsi səbəbindən əlavə pul verə bilmədikləri üçün körpələrə lazımi tibbi yardım göstərilməyib.
“Pul vermədiyimiz üçün uşaqlarımıza baxılmadı. Sonda iki körpəmi itirdim. Baş həkim Xuraman Bağırova isə bu barədə şikayət etməməyimiz üçün bizə pul təklif etdi,” – deyə ana bildirir.
Ailə yalnız üçüncü körpənin həyatını xilas edə bilib. Körpə hazırda K.Fərəcova adına Elmi-Tədqiqat Pediatriya İnstitutunda müalicə alır.
Əmirova Nərgiz və ailə üzvləri ölkənin birinci vitse-prezidenti Mehriban Əliyevaya müraciət edərək məsələ ilə bağlı obyektiv araşdırma aparılmasını və məsul şəxslərin cəzalandırılmasını xahiş ediblər.
Məsələ ilə bağlı 6 saylı Doğum Evinin rəhbərliyi ilə əlaqə saxlamaq mümkün olmayıb. Əməliyyatı həyata keçirən Tənzilə Əliyeva isə qısa olaraq pul almadığını deyib və dəstəyi asıb.
Qeyd edək ki, doğum evinin baş həkimi Xuraman Bağırova, institutun direktoru isə Cəmilə Qurbanovadır.
Hadisə ilə bağlı hüquq-mühafizə orqanlarına müraciət olunub və araşdırma başladılıb.
