Paytaxtın Səbail rayonu, Bayıl qəsəbəsi, Qurban Abbasov küçəsi, 42 ünvanında hasara alınmış ərazidə ağaclar kəsilərək məhv edilir. Burada tikinti işləri ilə məşğul olan “Avrasiya Baku İnşaat” MMC tərəfindən bəzi ağacların kökündən kəsildiyi bildirilir. Bu haqda bu gün, 4 oktyabr tarixində Real TV reportaj yayıb.
Sakinlər bildirirlər ki, ağacların kəsilməsi prosesi 2015-ci ildən başlayıb. “Avrasiya Baku İnşaat” MMC tərəfindən isə bu il binanın tikintisinə başlanılıb. Və bundan sonra daha çox ağac kəsilərək təbiətə ciddi ziyan vurulub.
Vətəndaşlar qeyd edirlər ki, qeyri-qanuni şəkildə 100-ə yaxın ağac kəsilib.
“Sakinlərin evinin görüntüsünü alıblar. Əksəriyyəti də yaşlı sakinlərdir”, - deyə şikayətçilər bildirirlər.
Çəkiliş zamanı tikinti şirkətinin nümayəndələri ilə danışmaq mümkün olmayıb. Qapını açmayan şirkətin əməkdaşları sualları cavablandıracaq məsul şəxslərin ərazidə olmadığını bildirdilər. Həmin adamaların əlaqə nömrələrini isə verməkdən imtina etdilər.
Ekologiya və Təbii Sərvətlər Nazirliyindən məsələ ilə bağlı bildirdilər ki, məsələni araşdırdıqdan sonra nəticə barədə bizə ətraflı məlumat veriləcək.
[caption id="attachment_73174" align="alignnone" width="640"]
Foto Real Tv-nin rəsmi Youtube kanalı[/caption]
