Sabunçu rayonunda ata qızının üzünə sulfat turşusu tökərək yandırıb. Bu haqda 27 sentyabr tarixində Lent.az məlumat verib.
Bakıxanov qəsəbəsində İldız İbayev 36 yaşlı Yeganə Əhmədovanın üzünə kimyavi maddə ("kislota") atıb.
Qadının həyat yoldaşı Elnur Əhmədov bildirib ki, hadisəyə xanımının valideynləri ilə arasında olan mülk davası səbəb olub:
“Bu məsələ 3 ildir ki, davam edir. Yoldaşımın valideynləri 17 il öncə qızlarına torpaq sahəsi hədiyyə etdi. Mən də həmin torpaq sahəsində ev tikmişəm və 17 ildir ki, həmin evdə yaşayırıq. Son 3 ildir ki, qarşılarına məqsəd qoyublar ki, bizdən o evi alsınlar. Qanuni yolla heç nə edə bilmədiklərinə görə, dünən səhər saat 9:00 radələrində yoldaşımın üzünə “kislota” tökərək, evdə heç kim olmadığı vaxtda onu öldürmək istəyiblər.
Yeganə balaca övladımı bağçaya aparanda qapının ağzında ata və anası yandırıcı maddəni əskiyə tökərək onun üzünə basıblar”.
Elnur Əhmədovun sözlərinə görə, hazırda Yeganə Əhmədova Kliniki Tibbi Mərkəzin Toksikologiya şöbəsində müalicə alır və həkimlər onun vəziyyətini orta-ağır qiymətləndirirlər. Qadının üzü tamamilə yanıb və səs telləri zədələnib. Bu səbəbdən Əhmədova danışa bilmir.
E.Əhmədov qayınatası və qayınanasından şikayətçidir: “Hadisə ilə bağlı polisə müraciət etmişik. Polislər ekspertizanın rəyini gözləyirlər. Ondan sonra istintaq başlanacaq”.
