Sərnişin avtobuslarının sürücüləri Xırdalan ərazisində onlara ayrılan xüsusi zolaqdan düzgün istifadə etmir.
Bu barədə Bakuplus.az-a şəhər sakinləri məlumat verib. Onlar bununla bağlı redaksiyamıza videolar göndərib.
Görüntülərdən də göründüyü kimi 592 və 515 nömrəli avtobus sürücüləri onları dayanacaqdan bir xeyli aralı saxlayaraq yolda təhlükəyə və tıxaca səbəb olur. Belə ki, bu zaman arxadan gələn digər sürücülər üçün maneə yaranır. Həmçinin sərnişinlər də sözügedən vəziyyətə görə narahat olur və avtomobil zolağına çıxmaq məcburiyyətində qalırlar.
Sərnişinlərin sözlərinə görə, belə hallar dəfələrlə qəza şəraiti yaradıb:
“Avtobusları harada gəldi saxlayırlar. Elə olur ki, dayanacaqdan uzaq, yolun ortasında saxlayaraq sərnişin düşürür və götürürlər”.
Məsələ ilə bağlı Azərbaycan Yerüstü Nəqliyyat Agentliyinə (AYNA) müraciət etdik. Ancaq gün ərzində müraciətimizə heç bir cavab verilmədi.
