Xırdalanda avtobus sürücülərinin onlar üçün ayrılan zolaqlardan düzgün istifadə etmədiyini xəbər vermişdik.
Mövzu ilə bağlı Bakuplus.az Azərbaycan Yerüstü Nəqliyyat Agentliyinə(AYNA) sorğu göndərmişdi. Sorğumuza AYNA-nın mətbuat katibi Tural Orucov cavab verib.
Onun sözlərinə görə, qanunvericiliyə əsasən, müntəzəm marşrutlarda sərnişinlərin nəqliyyat vasitələrinə minib-düşməsi yalnız nəqliyyat vasitəsi tam dayandıqdan sonra müvafiq dayanacaq məntəqələrində həyata keçirilməlidir.
“Daşıyıcılara sərnişindaşıma qaydalarına riayət etməyə, sərnişinlərin bilavasitə dayanacaq məntəqələrində mindirib-düşürdülməsi ilə bağlı tapşırıq verilib və bu məsələ tərəfimizdən nəzarətə götürülüb”, - deyə Tural Orucov qeyd edib.
O, həmçinin bildirib ki, sərnişinlər avtobuslarda rastlaşdıqları müxtəlif neqativ hallarla əlaqədar hüquq mühafizə orqanlarına, eləcə də AYNA-nın 141 Çağrı Mərkəzinə müraciət edə bilərlər.
“Bundan əlavə, Agentliyin bütün sosial şəbəkə platformaları üzərindən də müraciət etmək mümkündür”.
Qeyd edək ki, narazı sərnişinlər tərəfindən Bakuplus.az-a göndərilən videolarda konkret avtobus sürücülərinin yol hərəkəti qaydalarını kobud surətdə pozduqları aşkar əksini tapıb. Sakinlər AYNA-nın onlar barəsində zəruri tədbirlər görəcəyini və bu barədə ictimaiyyətə xəbər verəcəyini səbirsizliklə gözləyirlər.
