"Aygün dəfn olunanda Suraxanı kəndindən əlavə, Bakının bütün kəndlərindən gəlmişdilər. Dəfndə çox böyük izdiham var idi. Hətta rayonlardan belə onunla vidalaşmağa gəlmişdilər. Bəlkə də özü sağ olsaydı, bunları görsəydi, daha çox yaşayardı, ömrü uzanardı".
Bu sözləri Aygün Bəylərin bacısı azxeber.com-a açıqlamasında deyib.
Zümrüd Hümbətova dəfn mərasimində iştirak etməyən sənət adamlarından danışıb:
"Gözümüz yasda çox adamı axtardı. Çünki bilirik ki, Aygün xanım çox adama bu sənətdə cığır açıb, dəstək olub. Ad çəkə bilmərəm gəlməyənlər kimlər idi, çünki yadımda deyil, artıq bir ilə yaxın zaman keçib. Bu elə bir şeydir ki, hamımızın qapısında olacaq. Amma gəlməyənlər bəli, olub. Onun dəfn mərasiminə gəlməməkdə nə kimi səbəb olub, onu mən bilmirəm. Hər kəsin öz fikri var. Düzdür, ölümə heç kim sevinməz, amma mən özüm özlüyümdə belə fikirləşdim ki, Aygün kimlərinsə yolunda maneə idi, qaya idi, çəpər idi".
Zümrüd Hümbətova bacısının mahnılarını oxuduğu üçün onu qınayanlara cavab verib:
"Mən Aygünün vəsiyyətinə görə arada efirlərə çıxdım, onun mahnılarını oxudum. Hətta bir verilişdə Elza Seyidcahan açıq şəkildə dedi ki, "Mənim xoşuma gəlmir, sən Aygünün mahnılarını oxuyursan". Mən Aygünün sağlığında da onun mahnılarını oxuyurudm və bu gün Aygün sağ olsaydı, heç kəs mənə bu sözü deyə bilməzdi. Mənim avazımdan Aygünün avazı gəlir. Yəni, mən onlara xatir efirlərə gedirəm. Bir çox ifaçılar var ki, Aygünün mahnılarını oxuyurlar, yaşadırlar. Mahnı azaddır, musiqi azaddır. Mahnıları oxunduqca sənətkar yaşayır. Amma mən onun bacısıyam və bu ən çox mənim haqqımdır. Sağlığında bir çox mini disklərini verdi mənə ki, get oxu!"
