Bakının Binəqədi rayonu, Səttar Bəhlulzadə, 39 ünvanında yerləşən binanın zirzəmisində su borusu çürüyüb və hər an partlamaq üzrədir. Bu haqda bu gün, 11 yanvar tarixində Bakuplus.az Oxu.az-a istinadən məlumat verir.
Sızmaya görə narahat olan sakinlər “Azərsu” ASC-yə müraciət ediblər, lakin hadisə yerinə cəlb olunan əməkdaş borunu dəyişmək üçün vəsaiti olmadığını bildirib və sakinlərdən xamıt almaq üçün 60 manat pul tələb edib.
“İndi sizdən xahiş edirəm, borunu dəyişə bilmirsinizsə, heç olmasa, büdcədən mal-material üçün ayrılmış vəsaitdən bir dənə xamıt aldırıb, bu binanın partlayan borusunu təmir edəsiniz. Subasma halı olarsa, buna cavabdehliyi siz daşıyırsınız. Əks halda binanın suyunu kəsmək məcburiyyətində qalacağıq”, – məsələ ilə bağlı müraciət edən vətəndaş paylaşımda yazıb.
Qurumdan qeyd edilib ki, sızmadan məlumatlıdırlar və vətəndaşın şikayəti ilə bağlı məsələ aidiyyəti üzrə Binəqədi Sukanal İdarəsinə yönləndirilib, müvafiq tapşırıqlar verilib. Qısa müddətdə binada boru təmir ediləcək.
