“Əqrəb Mövsümü 2 - Dünya 1 olsa” yeni çoxseriyalı bədii filminin yayım vaxtı açıqlanıb. Bununla bağlı sosial şəbəkələrdə paylaşımlara rast gəldik. Bu mövsümdə nələr olacağı hər kəs üçün maraqlıdır.
Bakuplus.az-ın əməkdaşı filmin ssenaristi Azər Aydəmir ilə danışıb.
Ssenarist bildirib ki, filmin xətti real hadisələr əsasında yeni cinayət işinin üzərində cərəyan edir:
“Film fevralın 8-dən etibarən hər şənbə saat 22:00-da yayımlanacaq. Bu mövsüm də 12 seriyadan ibarətdir. Yeni hekayədir. Real hadisələr əsasında yeni cinayət işinin üzərində cərəyan edir”.
A.Aydəmir aktyor heyətindən də bəhs edib:
“Aktyorların demək olar ki, bir çoxu dəyişib. Daimi aktyorlardan mən, Rövşən Məmmədli, Elşən Rüstəmov və sevgilim rolunu canlandıran Fəridə Şahbazovadır”.
Azər Aydəmir bu mövsümün birincidən daha maraqlı və həyəcanlı olacağını söyləyib:
“Ümid edirəm ki, birincidən daha maraqlı və həyəcanlı olacaq. Çünki real hadisələr əsasında olması buna dəlalət edir. Həftəlik serialdır. Üç ay ərzində ölkənin gündəmini “Əqrəb mövsümü” ilə məşğul edəcəyimizə ümid edirik”.
Qeyd edək ki, daha öncə də “Əqrəb mövsümü” tamaşaçıların böyük marağına səbəb olmuşdu
“Əqrəb mövsümü” 2023-cü ilin yanvarında yayımlanıb. Dram, triller və detektiv janrlarını ehtiva edən serial Ceyhun Hidayətlinin 2015-ci ildə nəşr olunmuş “Əqrəb” romanı əsasında çəkilib. Rejissoru Emil Quliyev, ssenaristi Azər Aydəmirdir. İlk mövsümdə 12 seriyası yayımlanıb. Serialın çəkilişi 2021-ci ildə başa çatsa da, pandemiya səbəbindən yayımı gecikib.
Nəzrin Vahid
