Bu gün Azərbaycanda Ramazan ayının sonuncu günüdür. Martın 30-31-i ölkəmizdə Ramazan bayramı qeyd ediləcək.
Modern.az xəbər verir ki, bu gün imsak saat 05:02-də olub, iftar isə 19:19-da açılacaq.
Bu da 14 saat 17 dəqiqəlik oruc deməkdir ki, sona çatan Ramazan ərzində ən yüksək göstəricidir.
Qeyd edək ki, dünyanın müxtəlif bölgələrində günəşin doğuş və batma vaxtları fərqli olduğundan, imsak və iftar vaxtları arasında müddət də ölkələr arasında əhəmiyyətli dərəcədə dəyişir.
Şimal qütbünə yaxın yerləşən Reykyavikdə günəşin batma və çıxma vaxtları arasında böyük fərqlər olur. 2025-ci ilin mart ayında burada oruc müddəti təxminən 16-17 saat arasında dəyişib.
Şimal Avropada yerləşən Osloda da oruc tutanlar üçün günlər uzundur. Mart ayında oruc müddəti təxminən 15-16 saat təşkil edir.
Cənub yarımkürəsində yerləşən Keyptaunda mart ayında günlər daha qısadır. Burada oruc müddəti təxminən 11-12 saat arasında olub. Cənubi Amerikanın cənubunda yerləşən Buenos-Ayresdə də oruc müddəti nisbətən qısadır. Mart ayında burada müsəlmanlar təxminən 12-13 saat oruc tutublar.
