Bloqer Nərmin Bəylər qızı İsgəndərovanın vəfatı ilə bağlı günahkar qismində adı hallanan "Mərcan Medicare" klinikasının baş həkimi Araz Ağayev iddialara cavab verib.
Bakuplus.az xəbər verir ki, o, məsələyə sözügedən klinikanın rəsmi səhifəsində aydınlıq gətirib.
"2001-ci il təvəllüdlü İsgəndərova Nərmin Bəylər qızının 20.11.2024 tarixində bizim klinikada plastik cərrah Oruc Məmmədov tərəfindən əməliyyatı icra olunub. Xəstə əməliyyatdan bir neçə gün sonra kafi vəziyyətdə cərrah nəzarətində olmaqla ambulator müalicəyə yazılıb. Bundan sonra bir-iki dəfə sarğıya gəlib, hər hansı ciddi narahatlığının olduğu müşahidə edilməyib.
Sonralar xəstə təkrar müayinəyə və baxışa çağırılsa da, gəlməkdən imtina edib. Mətbuatda adı gedən Nurlan Həsənli Rusiyada tibb təhsili alıb, lakin Səhiyyə Nazirliyində sertifikasiya komissiyasından keçmədiyindən klinikamızda həkim köməkçisi kimi fəaliyyət göstərir".
Baş həkim qeyd edib ki, "Mərcan Medicare" klinikasının İqtisadiyyat Nazirliyinin 23 noyabr 2021 tarixli in/l-470/2021 nömrəli qeydiyyat nömrəsi ilə verilmiş lisenziyasına əsasən "plastik cərrahiyyə" fəaliyyəti ilə məşğul olmağa icazəsi var:
"Həmçinin, adıçəkilən tibb işçilərinin Azərbaycan Respublikasının qanunlarına uyğun olaraq fəaliyyəti davam edir. Onu da qeyd edim ki, N.İsgəndərova bizim klinikamızda deyil, bir aydan sonra naməlum səbəbdən vəfat edib".
***
14:29
Xəbər verdiyimiz kimi, Bakıda 23 yaşlı Nərmin İsgəndərova doktor Nurlan Həsənliyə qarın gərmə və bədənşəkilləndirmə əməliyyatı etdirib və bir müddət sonra ölüb.
Məsələ ilə bağlı sözügedən həkim milli.az-a açıqlama verərək bildirib ki, hər şey ekspertiza rəyindən sonra məlum olacaq.
"Ölənin arxasınca danışmazlar. Amma mən sübutları göstərə bilərəm".
Həkimə ünvanlanan digər suallara isə hazırda cavab vermək istəmədiyini bildirib. O, pasiyenti dəfələrlə klinikaya dəvət eləsə də, xanımın gəlmədiyini deyib.
***
12:04
Bakıda daha bir gənc qadın plastik əməliyyatın qurbanı olub.
Milli.az xəbər verir ki, hadisə “Mərcan” klinikasında baş verib.
Belə ki, 23 yaşlı Nərmin İsgəndərova doktor Nurlan Həsənliyə qarın gərmə və bədən şəkilləndirmə əməliyyatı etdirib.
Qızın anası Şahnaz Mehdiyevanın sözlərinə görə, qızı əməliyyata görə 5000 manat ödəniş edib. Əməliyyatdan bir müddət sonra xəstənin yarasından çirkli su axmağa başlayıb. Xəstə bu barədə həkimə məlumat versə də, təəssüf ki, həkim xəstəsinə laqeyd yanaşıb. Ailəsi bildirir ki, qadın irin axan yarasına öz hesabına dərmanlar tapmağa çalışıb. Lakin yolda halı pisləşib və oradaca dünyasını dəyişib.
Qeyd edək ki, vəfat edən Nərmin Mehdiyeva bloqer fəaliyyəti ilə məşğul olub. Bir qızı var.
***
10:56
Bloqer Nərmin Bəylər qızı Mehdiyeva vəfat edib.
Oxu.az xəbər verir ki, onun bədənşəkilləndirmə əməliyyatı etdirəndən sonra vəziyyəti pisləşib.
Qadın əməliyyatdan iki gün sonra aptekə gedib, daha sonra evdə meyiti tapılıb.
Məlumata görə, N.Mehdiyeva orta təhsilini yarımçıq qoyub, ailədə beş bacı olublar. N.Mehdiyevanın boşandığı, bir qız övladı olduğu bildirilir.
