2025-ci ilin yanvar-fevral ayları ərzində Azərbaycanda 1540.6 ton çay istehsal edilib.
Dövlət Statistika Komitəsindən “APA-Economics”ə verilən məlumata görə, çay istehsalı ötən ilin müvafiq dövrü ilə müqayisədə 21.7% azalıb.
Hesabat dövründə ölkəyə 18 milyon 610 min ABŞ dolları dəyərində 3047 ton çay idxal edilib ki, bu da ötən ilin müvafiq dövrü ilə müqayisədə dəyər ifadəsində 2.1 dəfə, həcm ifadəsində isə 73% artıb.
Qeyd edək ki, cari ilin ilk 2 ayında Azərbaycandan 1 milyon 105.9 min ABŞ dolları dəyərində 122.9 ton çay ixrac edilib. Çay ixracı 2024-cü ilin yanvar-fevral ayları ilə müqayisədə dəyər ifadəsində 20.8%, həcm ifadəsində isə ifadəsində 24.5% artıb.
Xatırladaq ki, çayın 1 kiloqramının orta ixrac qiyməti 15.3 manat, orta idxal qiyməti isə 10.4 manat təşkil edib.
Dövlət Statistika Komitəsinin məlumatına əsasən, ötən ay Azərbaycanda 500 qramlıq yerli çayın orta satış qiyməti 12 manat 54 qəpik, 500 qramlıq idxal çayının orta pərakəndə satış qiyməti isə 13 manat 25 qəpik təşkil edib.
Azərbaycanda çay istehsalı azalıb, idxalı isə artıb. Bəs, görəsən, bunun əsas səbəbləri nədir? Bu, iqtisadiyyatımıza necə təsir edə bilər?
Mövzu ilə bağlı Bakuplus.az-a açıqlama verən iqtisadçı-ekspert Xalid Kərimlinin sözlərinə görə, çayın becərilməsi azalıb, idxalı artıb:
“O qədər də böyük rəqəmlər deyil. Kənd təsərrüfatı məhsullarının istehsalı iqlimlə bağlı olan məsələdir. Bir il məhsuldarlıq çox olanda, növbəti il az ola bilər. Davamlı olaraq yüksək məhsuldarlıq tələb etmək düzgün deyil. Manatın güclü qalması bəzən idxalı yerli istehsaldan daha sərfəli edir. Fikirləşməyək ki, özümüz istehsal etsək, daha ucuz və keyfiyyətli olacaq. Biz bunu gündəlik istifadə məhsullarında müşahidə edirik”.
“Azərbaycanda becərilən çay ölkə əhalisinin tələbatına cavab vermir. Azərbaycan davamlı olaraq Hindistandan, Cənub Şərqi Asiya ölkələrindən, Çindən, Şri-Lankadan çay idxal edir. Bu proses həmişə olub. Azərbaycanda çay cənubda yetişdirilir. Bu isə ölkənin tələbatına cavab verəcək həcmdə deyil.
Manatın da davamlı güclü saxlanılması yerli istehsalı baha edir. Daha əlverişli qiymətlər ilə idxal etmək mümkün olanda sahibkarlar idxala üstünlük verir”, - deyə X.Kərimli fikrini tamamlayıb.
Nəzrin Vahid
