Türkiyədə baş vermiş güclü zəlzələ zamanı minlərlə binanın dağılmasına səbəb tikintinin qaydalara uyğun aparılmamasıdır. Mütəxəssislər belə qənaətə gəliblər ki, tikinti zamanı keyfiyyətə önəm verilməyib. Hər il Bakıda yeni ünvanlarda yüzlərlə yaşayış binası tikilir. Amma onların bir qismi tikinti şirkətləri tərəfindən rəsmi olaraq istismara verilmədən sakinlərə verilir. Bu haqda bu gün, 21 fevral tarixində Bakuplus.az Xəzər Xəbər-ə istinadən məlumat verir.
Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi tərəfindən binanın tikinti layihəsinin olub-olmaması və yüksək keyfiyyətli tikinti materiallarından istifadə olunması yoxlanıldıqdan sonra binanı istismara qəbul edir. Amma bu gün istifadəyə verilməyən yeni tikililərdə yaşayanlar da var.
Tikinti üzrə ekspert Şirin Şərifov hesab edir ki, sakinlər ev tikintisi layihəsini MTK-dan tələb edə bilərlər.
Ekspert qeyd edir ki, bina tikintisi aparıldığı gündən Fövqəladə Hallar Nazirliyinin əməkdaşları binanın bünövrəsinin ölçülərini, hər mərtəbədə və tikinti meydançasında istifadə olunan sütun və armaturları diqqətlə yoxlayırlar. Parametrlər tikinti layihəsinə uyğun gəlmirsə, növbəti mərtəbənin tikintisinə icazə verilmir.
Şirin Şərifovun sözlərinə görə, paytaxtda tikilməkdə olan bəzi evlərdə tikinti layihəsinin olmaması sakinlərin narahatlığına səbəb olur. O, hesab edir ki, gələcəkdə belə binalar istisimara qəbul edilmədiyindən mənzil sahiblərinə çıxarış da verilməyəcək.
