Bakıda metro çıxışında insanları avtomobillər “qarşılayır”. Bu haqda BakuPlus.az bu gün, 5 aprel tarixində xəbər verir.
Söhbət Nəsimi rayonunda yerləşən Memar Əcəmi metro stansiyasının Cavadxan küçəsindəki çıxışından gedir.
Sakinlər bu vəziyyətdən narahat olduqlarını bildiriblər: “Təsəvvür edin metrodan çıxırsınız və birdən üzərinizə avtomobil gəlir. Bu yuxu, ya da hansısa filmdən fraqment deyil, Əcəmi metrosunun Cavadxan küçəsində yerləşən çıxışıdır.”
Metronun çıxışındakı ərazi beşmərtəbəli binanın həyətinə təsadüf edir. İnfrastruktur da uyğun olduğundan sürücülər həmin ərazidə nəqliyyat vasitələrini park edirlər.
Yaşayış binasının altında obyektlərin olması, ətrafda piştaxtaların yerləşdirilməsi isə həmin əraziyə böyük ölçülü nəqliyyat vasitələrinin də girməsinə səbəb olur. Bəzi işbazlar isə hətta həmin ərazidə park edilən avtomobillərə görə ödəniş də tələb edirlər.
İstər paytaxt sakinləri, istərsə də metrodan istifadə edən paytaxtımızın qonaqları üçün metronun bu çıxışı tam təhlükəsiz deyil.
