Bakının Xəzər rayonu, Binə qəsəbəsində yerləşən cəzaçəkmə müəssisəsinə yaxın ərazidə nə su, nə də kanalizasiya xətləri mövcüd deyil. Sakinlər ehtiyaclarını ya subartezian quyularından əldə etdikləri şorlu su ilə ödəyir, ya da pul ödəyib şirin su almaqla kifayətlənirlər. Bu haqda bu gün, 29 iyul tarixində Real TV reportaj təqdim edib.
Sakinlərin sözlərinə görə, quyudan istifadə onların ehtiyaclarını qismən ödəyir. Lakin suyun şor olmasını nəzərə aldıqda aydın olur ki, bu suyun xeyirdən çox ziyanı var. Şikayətçilərin su ilə yanaşı, kanalizasiya problemləri də var.
“Azərsu” ASC-nin mətbuat xidməti və ictimaiyyətlə əlaqələr şöbəsinin rəisi Anar Cəbrayıllı məsələyə aydınlıq gətirib: “Həmin ərazidə nə içməli su, nə də kanalizasiya şəbəkəsi mövcüd deyil. Ümumiyyətlə, Binə qəsəbəsinin bu gün təxminən 30 faizi mərkəzləşdirilmiş içməli su ilə təmin olunur. Kanalizasiya infrastrukturu, demək olar ki, qurulmayıb. Bizim baş planda həm su təchizatı, həm kanalizasiya sistemlərinin yaradılması nəzərdə tutulub. Hazırda Binə qəsəbəsində 10 minə yaxın abonent formalaşıb, və bu işlər mərhələli şəkildə davam etdirilir. Ceyranbatandan Qala istiqamətində 3-cü magistral kəmər xəttinin inşasına bu ildən start verilib. Bu xətt imkan verəcək ki, Binə qəsəbəsinin bütün əraziləri davamlı şəkildə su ilə təmin edilsin. Gələcəkdə, növbəti mərhələlərdə dövlət investisiya hesabına kanalizasiya layihələri icra olunacaq”.
[caption id="attachment_54462" align="alignnone" width="300"]
Foto Real TV-nin rəsmi Youtube kanalı[/caption]
