Paytaxtın gözəlliyi üçün yol kənarına qoyulan dibçəklər piyadaların gediş-gəlişini çətinləşdirir. Bu haqda 26 mart tarixində Bakuplus.az ATV-ə istinadən xəbər verir.
Bəşir Səfəroğlu küçəsində dar səkinin üzərinə dibçək qoyulub. İnsanlar səki ilə gedə bilmədiklərindən, yolun hərəkət hissəsinə çıxmalı olurlar. Oxşar mənzərə Əlövsət Quliyev və Mirzə İbrahimov küçələrində müşahidə olunur.
“Dibçəklərin yollar boyunca düzəlməsi ürəyimcədir. Ancaq bəzi səkilərin eni yarım metr olduğundan iri dibçəklər gediş-gəlişə maneə yaradır”, - sakinlərdən biri deyib.
Nəqliyyət üzrə ekspert Elməddin Muradlı bildirir ki, dar səkilərin üzərindəki bu mənzərə həm piyadalar, həm də sürücülər üçün təhlükəlidir. Piyadalar məcbur olub yola çıxır və nəticədə qəza təhlükəsi qaçılmaz ola bilər.
“Bəzi dar səkilərin üzərinə dibçəklərin qoyulması avtomobillərin orada saxlanılmasının qarşısını almaq məqsədi daşıyır. Xidmətin əməkdaşları həmin ərazilərə yenidən baş çəkəcək, piyadaların hərəkətinə çətinlik yaradan dibçəklər ərazidən götürüləcək”, - məsələ ilə bağlı Bakı Abadlıq Xidməti aydınlıq gətirib.
