Paytaxtın Binəqədi rayonu, Biləcəri qəsəbəsi, Teymur Yaqubov küçəsi, 8 ünvanında yerləşən dəmir yolu yataqxanasının həyətində yaşayış evi tikilir. Bu haqda bu gün, 15 iyun tarixində Bakuplus.az Xəzər Xəbər-ə istinadən məlumat verir.
Ərazidə aparılan tikinti işləri yataqxanada məskunlaşan məcburi köçkünlər olan sakinlərin qəzəbinə səbəb olub. Sakinlər bildirirlər ki, bir neçə gündür tikintisi başlanan yarımçıq tikili həyətin bir hissəsini tutur. Tikinti işlərini eyni yataqxanada yaşayanlardan biri həyata keçirir.
Tikintini aparan İsa Səfərov bildirib ki, işləri aparmaq üçün heç bir dövlət orqanından icazə almayıb. Onu da əlavə etdi ki, həyət evi tikirmiş, yaxın günlərdə sökəcək.
Məsələ ilə bağlı Binəqədi rayon İcra Hakimiyyətinin Biləcəri qəsəbə nümayəndəsi bildirdi ki, tikinti işləri qanunsuzdur. Yarımtikilinin sökülməsi ilə əlaqədar olaraq Fövqəladə Hallar Nazirliyinə də məlumat veriləcək.
