Məsələ ilə bağlı “Bakı Metropoliteni” QSC sorğumuza cavab verib.
"Azadlıq prospekti-Dərnəgül" yol mənzilində tunelə yerüstü sahədən spesifik qoxu daxil olduğu üçün havalandırma sistemi sovurmaya qoşulub və qısa müddətdə aradan qaldırılıb. Hər iki stansiyada sərnişin şikayəti qeydə alınmayıb", - deyə qurumdan bildirilib.
***
09:29
Bu gün səhər saatlarında “Bakı Metropoliteni” QSC-nin “Azadlıq prospekti” – “Dərnəgül” stansiyaları hissəsində, eləcə də “Dərnəgül” stansiyasında kəskin qoxu hiss edilib.
Bu barədə Bakuplus.az redaksiyasına sakinlərdən müraciət daxil olub.
Bildirilib ki, üfunət o dərəcədə kəskin olub ki, bəzi sərnişinlərdə ürəkbulanma müşahidə edilib. Həmçinin bu zaman qeyd edilən ərazidə olan insanların hətta gözlərindən yaş da gəlib.
“Qoxudan hiss olunurdu ki, bu, ya hansısa kimyəvi maddədir, ya da hansısa istehsal prosesindən sonra tullantılardır. Metropoliten rəhbərliyi gərək belə məsələlərə operativ reaksiya versin”, - deyə sərnişinlərdən biri bildirib.
Məsələ ilə bağlı “Bakı Metropoliteni” QSC-yə sorğu ünvanlamışıq.
