“Bakıətrafı ərazilərdəki avtomobil yolları qaranlığa qərq olub. Zabrat-Maştağa, Kürdəxanı-Pirşağı yollarında işıq dirəkləri olsa da, yollar işıqlandırılmır”.
Qafqazinfo.az xəbər verir ki, bu barədə Sabunçu rayonunda yaşayan bir qrup sakin məlumat verib.
Onların sözlərinə görə, gecə saatlarında həmin yollardan keçmək çətinlik yaradır. Yolların zülmətə qərq olması qəza hadisələrini də qaçılmaz edir.
Problemlə bağlı Bakı Şəhər İcra Hakimiyyətinin tabeliyində “Bakı Şəhər İşığı” Elektrik Şəbəkə Müəssisəsinə müraciət edilib. Qurumdan sorğuya cavab olaraq bildirildi ki, hazırda sözügedən istiqamətlərdə işıqlar qoşulmayan küçələr xidmətə verildikcə, onların işıqlandırılması təmin edilir: “Zabrat-Maştağa, Kürdəxanı-Pirşağı yollarına Bakı Abadlıq Xidməti tərəfindən işıq çəkilib. İndi həmin xidmətdən “Bakı Şəhər İşığı” Elektrik Şəbəkə Müəssisəsinə təhvil verilmə işləri gedir. Elə küçələr var ki, işıqlar qoşulub. Harada işıqlandırılmayan yerlər var, İdarə xidmətə götürdükcə, onların da işıqlandırılması təmin ediləcək”.
