Bakıda ər arvadını xəyanətdə ittiham edərək döyüb.
Bakuplus.az-ın əldə etdiyi məlumata görə, hadisənin istintaqı Suraxanı Rayon Məhkəməsində keçirilib.
Belə ki, təqsirləndirilən Nicat Qaraşov (ad şərtidir) birgə yaşadıqları evdə həyat yoldaşı Sevinc Qaraşovanı (ad şərtidir) amansızca döyüb. Buna səbəb Sevincin guya ona xəyanət etməsi olub. Belə ki, Nicat Sevincin əli ilə onun bədəninin müxtəlif nahiyələrinə vurub, ardından isə başı ilə gözünə ağır zərbə endirib.
Nicat Qaraşov Azərbaycan Respublikası CM-nin 128-ci (qəsdən sağlamlığa zərbə vurma) maddəsi ilə təqsirləndirilib.
Məhkəmədə təqsirləndirilən Nicat Qaraşov ona qarşı irəli sürülən ittiham üzrə özünü təqsirli bilib:
“Bakıda həyat yoldaşım Sevinc və üç övladımla birlikdə yaşayırıq. 2014-cü ildə ailə həyatı qursaq da, rəsmi nikahımız yoxdur. Son zamanlar həyat yoldaşım mənə qarşı soyuq rəftar edir, evdə məni saymır, hər sözümə əsəbi cavablar verirdi. Bu səbəbdən düşünürdüm ki, mənə xəyanət edir. Sonuncu dəfə hadisə günü xəyanətini etiraf etmədiyi üçün əsəbiləşərək onu döydüm. Kəllə ilə gözünə vurdum, əllərimlə döyməyə başladım”.
Daha sonra zərərçəkmiş Sevinc Qaraşova ifadə verib:
“Nicat mütəmadi heç bir əsas olmadan guya mənim xəyanət etdiyimi bildirərək mübahisələr yaradırdı. Hadisə günü yenə eyni səbəbdən mübahisə etməyə başladı və xəyanət etdiyimi bildirib məni döydü. Gözümə elə vurdu ki, yerindən çıxacaqdı. Ondan şikayətçiyəm”.
Sonda məhkəmənin qərarı ilə Nicat Qaraşov 1 il müddətində azadlıqdan məhrum edilib.
Fidan İlqar
