Emal Sənayesi üzrə Bakı Dövlət Peşə Təhsil Mərkəzində təhsil alanların təqaüdləri 2 aydır ki, ödənilmir.
Bu barədə bizim.media-ya sözügedən təhsil mərkəzinin tələbələrindən şikayət daxil olub.
Belə ki, dekabrın əvvəlindən bəri tələbələrin təqaüdləri ödənilməyib. Həmçinin digər təhsil müəssisələrində Yeni illə əlaqədar təqaüdlər tez köçürüldüyü halda, adıçəkilən müəssisədə hələ də heç bir köçürülmə həyata keçirilməyib.
Tələbələrin narazı olduğu əsas məqam budur ki, bu hal ilk dəfə yaşanmır. Daha əvvəl də təqaüdün 2 ay gecikdirildiyi olub.
Bəs problem nədən qaynaqlanır?
Peşə Təhsili üzrə Dövlət Agentliyinin PR və Kommunikasiya üzrə sektor müdiri Aytən Səfərəliyeva açıqlamasında bildirib ki, qeyd edilən Peşə Təhsil Mərkəzində təqaüdlərin 2024-cü ilin noyabr-dekabr ayları üçün ödənilməsi planlaşdırılsa da, vəsait çatışmazlığı səbəbindən 2025-ci ilin yanvar ayında ödəniləcək.
“Həmçinin ödənilməyən ayların təqaüdünün də həmin vaxtda ödənilməsi nəzərdə tutulub”, - deyə Agentlik rəsmisi qeyd edib.
