Bakıda yaşlı kişi xəstəxanada xidmət göstərilməməsindən narazıdır.
Bununla bağlı Bakuplus.az-a şikayət ünvanlanıb.
Şikayətçi Fikrət Quliyev Qaradağ rayonunun 3 nömrəli Birləşmiş Şəhər Xəstəxanasında ona xidmət edilmədiyini qeyd edib:
“Sahil qəsəbəsində xəstəxanadayam. Xahiş edirəm ki, kömək edəsiniz. Xəstəxanada heç bir xidmət göstərilmir. Hazırda heç kəsim də yoxdur. Boğuluram, özümü yaxşı hiss etmirəm. Xəstəxanada su verən də yoxdur”.
Məsələ ilə bağlı Tibbi Ərazi Bölmələrini İdarəetmə Birliyinə (TƏBİB) sorğu ünvanladıq.
TƏBİB-dən Bakuplus.az-ın sorğusuna cavab olaraq bildirilib ki, 1954-cü il təvəllüdlü Quliyev Fikrət Nazim oğlu 03.01.2025-ci il tarixində təcili tibbi yardım briqadası tərəfindən 3 nömrəli Birləşmiş Şəhər Xəstəxanasına hospitalizasiya olunub:
“Ona aşağı ətraf venalarının xora və iltihabı ilə ağırlaşmış varikoz genişlənməsi, aşağı ətrafların dəqiqləşdirilməmiş tromboflebiti və ürəyin işemik xəstəliyi diaqnozları qoyulub, laborator analizlər (qanın ümumi və biokimyəvi analizləri), EKQ və USM müayinələri aparılıb, müalicə həkimi tərəfindən müvafiq müalicə təyin olunub. Hazırda xəstənin vəziyyəti ağır qiymətləndirilir və stasionar müalicəsi davam etdirilir”.
Nəzrin Vahid
