Bakı Ağır Cinayətlər Məhkəməsində hakim Eldar İsmayılovun sədrliyi ilə gözəllik salonunda işləyən arvadını öldürən Bəxtiyar Vəliyevin cinayət işi üzrə məhkəmə istintaqı başlayıb.
Lent.az xəbər verir ki, məhkəmə iclasında zərərçəkmiş şəxsin hüquqi varisi Samirə Həsənova prosesin qapalı keçirilməsi ilə bağlı vəsatət verib. Vəsatətini belə izah edib ki, mərhum bacısı qızı, təqsirləndirilən şəxs isə qardaşı oğludur. Qısa müşavirədən sonra hakim bildirib ki, vəsatət əsassız olduğundan təmin olunmayıb.
Sonra dövlət ittihamçısı ittiham aktını elan edib. Məlum olub ki, avqustun 15-də Bəxtiyar Vəliyev həyat yoldaşı Xumar Həsənlinin mobil telefonunda onun tanımadığı şəxslə birlikdə olan şəklini görüb. Arvadını qətlə yetirmək məqsədi ilə ayın 16-ı saat 23:30-da Zabrat qəsəbəsində yerləşən “Rahat market”dən mətbəx bıçağı alıb. Övladları ilə birgə idarə etdiyi “Nissan” markalı avtomobillə arvadının işlədiyi gözəllik salonuna gələrək, onu götürüb. Birlikdə qayınanası Samirə Həsənovanın evinin qarşısına gəlib, uşaqlarını içəri yola salıblar. Maşında yoldaşının mobil telefonunu götürüb, yenidən onunla fotoşəkili və videogörüntüləri olan şəxsin kimliyini soruşduqda, Xumar Həsənli cavab verə bilməyib və avtomobildən enib. Bundan qəzəblənən Bəxtiyar Vəliyev də maşından çıxaraq, darvazanın qarşısında qadını saxlayıb. Döş qəfəsinə və bədəninin digər nahiyələrinə ümumilikdə 11 dəfə bıçaq zərbəsi vurub. Aldığı xəsarətlərdən zərərçəkmiş Sabunçu Tibb Mərkəzində ölüb.
Bəxtiyar Vəliyev ittiham üzrə özünü qismən təqsirli bilib.
Məhkəmə prosesi 15 yanvar 2025-ci il tarixinə kimi təxirə salınıb.
Xatırladaq ki, bu il avqustun 17-də Xumar Həsənlinin (1999-cu il təv.) aldığı bıçaq xəsarətlərindən 3 saylı şəhər klinik xəstəxanasında ölməsi barədə 12-ci polis şöbəsindən Sabunçu rayon prokurorluğuna məlumat daxil olub. Həmin gecə cinayəti törədən mərhumun əri Bəxtiyar Vəliyev saxlanılaraq, istintaqa təhvil verilib.
