Bakının Binəqədi rayonu, Biləcəri qəsəbəsində yerləşən “Stop” nişanı sürücülərə təhlükə yaradır. Bu haqda bu gün, 28 oktyabr tarixində Bakuplus.az ARB Xəbər-ə istinadən xəbər verir.
Ərazidə yerləşən “Stop” nişanı əvvəlcədən orada işləyən dəmir yoluna görə quraşdırılmışdı. Lakin indi dəmir yolu istifadə olunmur, ancaq nişan ərazidən götürülməyib. Bundan əlavə, nişan döngədə qoyulduğundan, sürücülər onu gec görürlər.
“Burada çox qəza olur. Nişanı gec görürük, bu səbəbdən də qəfil əyləci sıxırıq. Arxadan gələn avtomobil də manevr etməyi çatdırmır, nəticədə qəza baş verir”, – deyə sürücülər şikayət edirlər.
Nəqliyyat üzrə ekspert Ərşad Hüseynov bildirib ki, nişan heç bir əhəmiyyət daşımır və oradan götürülməlidir.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucov isə vurğulayıb ki, dəmir yolu nişanının həmin ərazidə mövcudluğu hüquqi cəhətdən səhv sayılmır. Əraziyə qurum tərəfindən baxış keçirilib. Məsələ Azərbaycan Dəmir Yolları ilə araşdırıldıqdan sonra nişan oradan götürüləcək.
