Bakının Binəqədi rayonunun Biləcəri qəsəbəsində yaşayan sakinlər su ilə bağlı çətinlik çəkirlər. Bu haqda bu gün, 6 noyabr tarixində Bakuplus.az “Space News”a istinadən xəbər verir.
Natiq Həşimi və Mikayıl Mikayılov küçələrində yaşayan sakinlərin sözlərinə görə, yay aylarından bu günə qədər binalara normal su gəlmir.
“Suyu mənzilin birinə verirlər, o birinə vermirlər. İstədikləri vaxt suyu verirlər, istədiklərində kəsirlər. Suyun təzyiqi elə az olur ki, 5 litrlik bidonu yarım saata doldururuq”, - deyə sakinlər şikayət edirlər.
“AZƏRSU” ASC-nin mətbuat katibi Anar Cəbrayıllının sözlərinə görə, həmin ərazilərdə suyun verilməsi təsdiqlənmiş qrafikə uyğun olaraq həyata keçirilir. Buna səbəb cari ilin fevral ayından su ehtiyatlarının azalmasıdır.
“Yay mövsümü başa çatıb və suya tələbat azalıb. Bu səbəbdən həmin ərazidə təchizatın qrafiklərinə yenidən baxılması nəzərdə tutulub və bundan sonra həmin ərazi yeni qrafik rejimi ilə su ilə təmin olunacaq”, - deyə qurum rəsmisi əlavə edib.
