Binəqədi qəsəbəsinin şəhid Orxan Cabbarovun adını daşıyan küçəsində yaşayan sakinlər yol və zibil problemindən şikayət edirlər. Bu haqda bu gün, 5 aprel tarixində Space News-a istinadən Bakuplus.az məlumat verir.
Yollar keçilməz olub, bir neçə avtomobil isə batıb, palçıqda qalıb. Qəsəbə sakinləri yolsuzluqdan atrıq 30 ildir əziyyət çəkirlər.
Sakinlər deyirlər ki, dəfələrlə müraciət etsələr də, aidiyyəti qurumlar məsələyə etinasız yanaşıb. Çarəsiz qalan sakinlər çıxış yolunu özləri tapmağa çalışıblar. Öz vəsaitləri ilə gücləri çatan qədər yolları təmir ediblər. Lakin ərazidə kanalizasiya və su şəbəkəsi qurulduğu üçün təmir olunan yollar dağıdılaraq yenidən yararsız vəziyyətə salınıb.
Bu azmış kimi, ərazidə antisanitar vəziyyət hökm sürür. Səbəb isə küçədə zibil qutularının olmamasıdır.
Qəsəbə bələdiyyəsindən bildirildi ki, həmin ərazidə illərdir məişət tullantılarının daşınması siqnal üsulu ilə həyata keçirilir. Zibil yeşiklərinin qoyulmamasına gəlincə isə qurumun əməkdaşı açıqlama verib: “Bir çox küçələr ensiz olduğundan xüsusi təyinatlı maşınlar konteynerləri daşıyıb geriyə qayıda bilmir. Həftənin 2 günü vətəndaşların qapıları bir-bir döyülərək məişət tullantıları ərazilərdən yığılır”.
Binəqədi RİH-dən isə bildirildi ki, rayon ərazisində yenidənqurmaya ehtiyacı olan qəsəbədaxili yolların mərhələli qaydada təmiri ilə bağlı RİH tərəfindən siyahi tərtib edilərək AAYDA-ya göndərilib. O göndərişə isə agentliyin nə vaxt cavab verəcəyi hələlik məlum deyil.
