Bakının Binəqədi rayonunda yaşayış binasında mənzillərə çirkli su gəlir. Bu haqda bu gün, 19 fevral tarixində Bakuplus.az ARB Xəbər-ə istinadən xəbər verir.
Sözügedən binaya içməli su verilsə də, sakinlər su problemi yaşayırlar.
Belə ki, su o qədər çirkli olur ki, onlar ya suyu alırlar, ya da su filtrləli quraşdırırlar. Sakinlərin sözlərinə görə, filtrlər 6 aydan bir təmizlənməlidir, lakin çirkə görə onlar iki aydan bir filtr təmizləməli olurlar.
“Krandan qum tökülür. Kombi yuduzdurmaqdan, qırıq kranları və su filtrlərini dəyişdirməkdən yorulmuşuq. Böyük maddi ziyan dəyir bizə”, – deyə sakinlər şikayət edirlər.
İddia edilir ki, suyun çirkli olmasına səbəb binanın vaxtında yuyulmayan çənidir. Ancaq komendant bununla razı deyil.
“Vaxtında biz yoxlama aparmışıq. Məlum olub ki, problem suyun özündədir”, – deyə komendant bildirib.
“Azərsu” ASC deyir ki, suyun çirkliliyi binanın ehtiyat çənləri ilə əlaqədardır. Çənlərin təmizlənməsi ilə bağlı MTK rəhbərliyinə göstəriş verilib, amma bu məcburi xarakter daşımır. Məcbur etmə yalnız Respublika Gigiyena və Epidemiologiya Mərkəzinin işidir. Adıçəkilən qurum belə bir göstəriş verərsə, “Azərsu” ASC həmin binaya su verilişini müvəqqəti dayandıracaq.
