Bu gün, 12 avqust tarixində Binəqədi rayonunun Novxanı qəsəbəsi yaxınlığında yerləşən dəniz sahilində genişmiqyaslı təmizlik aksiyası keçirilib. Bu haqda Bakuplus.az Ekologiya və Təbii Sərvətlər Nazirliyinin mətbuat xidmətinə istinadən məlumat verir.
Xəzər Gününə həsr olunmuş aksiya Ekologiya və Təbii Sərvətlər və Xarici İşlər Nazirlikləri, İcbari Tibbi Sığorta üzrə Dövlət Agentliyi, Binəqədi Rayon İcra Hakimiyyətinin rəsmiləri və əməkdaşlarının, Alpinizm Federasiyası nümayəndələrinin, eləcə də ASAN könüllüləri və ekokönüllülərin iştirakı ilə baş tutub.
İməcilik zamanı sahilboyu ərazilər 1 tona yaxın plastik və digər tullantılardan təmizlənib.
Təmizlik aksiyaları Xəzər dənizinin Azərbaycana aid şimaldan cənuba bütün sahilboyu ərazilərində – Xaçmaz, Siyəzən, Şabran, Neftçala, Salyan, Lənkəran, Astara rayonlarının və Sumqayıt şəhərinin Xəzər sahilində də baş tutub, ərazilər tullantılardan təmizlənib.
Xəzər dənizinin dəniz ətraf mühitinin mühafizəsi haqqında Çərçivə Konvensiyası 12 avqust 2006-cı il tarixində qüvvəyə mindikdən sonra hər il bu tarix Xəzər Günü kimi qeyd olunur.
[URIS id=109311]
