Bakının Binəqədi rayonu, Üzeyir Hacıbəyov, 4B ünvanında yerləşən yaşayış binasının zirzəmisinə çirkab sular dolub. Bu haqda bu gün, 7 noyabr tarixində Bakuplus.az Xəzər Xəbər-ə istinadən məlumat verir.
Sakinlər sözlərinə görə, zirzəmiyə kanalizasiya suyu dolur, qurumların əməkdaşları gələrək baxış keçirirlər, problemi tapa bilməyib məsələni kökündən həll etmirlər. Nəticədə üfunət mənzillərə çatır.
Son müraciətdən sonra məsələ ilə bağlı əraziyə Binəqədi rayon Sukanal İdarəsinin qəza briqadası cəlb olunub. Baxış keçiriləndən sonra binanın zirzəmisi çirkab sulardan təmizlənib.
“Azərsu” ASC-nin departament rəhbəri Anar Cəbrayıllının sözlərinə görə, binanın zirzəmisindəki əsas toplayıcı kanalizasiya xətləri tam işlək vəziyyətdədir. Həmçinin o bildirib ki, kanalizasiyanın dolmasına səbəb sakinlərin məişət tullantılarını kanalizasiya xətlərinə atmalarıdır.
