Binəqədi rayonunda sudan qanunsuz istifadəyə qarşı yoxlama aparılıb. Bu haqda bu gün, 3 noyabr tarixində Bakuplus.az “Azərsu”ya istinadən xəbər verir.
Səttar Bəhlulzadə küçəsində 11 obyektin fəaliyyət göstərdiyi qeyri-yaşayış binasında içməli sudan sayğacdankənar istifadə halı aşkarlanıb. Sahibkarlar magistral xətdən su çəkərək binada yerləşən iaşə müəssisələri, mağazalar və xidmət obyektlərini su ilə qanunsuz təmin ediblər.
Biləcəri qəsəbəsi, “Yeni massiv” adlanan ərazidə yeni tikilmiş fərdi yaşayış evlərində də içməli sudan qeyri-qanuni istifadə halları aşkarlanıb. Belə ki, fərdi yaşayış evlərinin tikintisi ilə məşğul olan şəxs yaxınlıqdan keçən magistral su kəmərinə qanunsuz qoşulma verib. O, su kəmərini ərazidən keçən dəmir yolu xəttinin altından keçirərək 500 metr uzunluğunda su xətti çəkib. Qanunsuz çəkilmiş xətdən fərdi yaşayış evləri su ilə təmin olunub.
Aşkar olunan bütün qanunsuz xətlər ləğv olunub, dəymiş zərər hesablanıb.
Cari ilin yanvar-sentyabr aylarında Binəqədi rayonu üzrə 2733 sudan qanunsuz istifadə halı müəyyən edilib.
[caption id="attachment_118689" align="alignnone" width="640"]
Foto Azərsu ASC-nin rəsmi saytı[/caption]
