Bakı şəhəri, Binəqədi rayonunda “Azərsu” ASC tərəfindən içməli sudan sayğacdankənar istifadə halları aşkar edilib. Bu haqda bu gün, 27 aprel tarixində Bakuplus.az qurumun mətbuat xidmətinə istinadən məlumat verir.
Rayonun 2-ci mədən, 78-ci ev ünvanında fəaliyyət göstərən ət kəsimi məntəqəsində suyun oğurlanması müəyyən edilib. Sahibkar texniki şərtlər almadan öz gücü ilə şəbəkəyə qoşulub. Özünü qazi kimi təqdim edən sahibkar sudan qanunsuz istifadə etməklə yanaşı, qurum işçilərinin qanuni tələblərinə də məhəl qoymayıb.
Nurlu massivinin Binəqədi qəsəbəsində tikilmiş yaşayış binasında sudan texniki şərt alınmadan, müqavilə bağlanmadan qanunsuz istifadə olunur. Nəzarət tədbirləri zamanı sahibkara məxsus 12 mənzildən ibarət yeni tikilmiş fərdi yaşayış evlərinin hər birinə qanunsuz su xətti çəkildiyi də müəyyən edilib.
Bu cür qanunsuz halların qarşısının alınması üçün tədbirlər mütəmadi olaraq davam etdiriləcək, icazəsiz və qeydiyyatsız xətlər ləğv ediləcək.
