Bakının Binəqədi rayonunun 3-cü Mədən adlanan ərazisində yollar burada yaşayan sakinləri narahat edir. Bu haqda bu gün 11 avqust tarixində Bakuplus.az ATV Xəbər-ə istinadən məlumat verir.
Sakinlər ərazidə olan küçənin yolunda asfalt örtüyünün olmamasından şikayətçidirlər. Bütün yol çuxurlardan və torpaqdan ibarətdir. Burada qışda palçıq olur, yayda isə hər yer qum və tozla örtülür.
Bu yol yük avtomobilləri tərəfindən alternativ yol kimi istifadə olunur və buna görə problem qəlizləşir. Taksi sürücüləri bu küçəyə gəlməkdən imtina edirlər. Buna görə sakinlər bir sıra işlərinin arxasınca vaxtında gedib-gələ bilmirlər. Məktəbə və bağçaya gedən uşaqlar da çətinlik çəkirlər.
Sakinlər bildirirlər ki, onlar Binəqədi Rayon İcra Hakimiyyətinə (RİH) müraciət ediblər. RİH əməkdaşlarının dediyinə görə, onlar bu məsələ ilə məşgul olacaqlar və bununla bağlı aidiyyəti qurumlara müraciət ediblər. Bu yolların mərhələli qaydada təmiri nəzərdə tutulur.
