Binəqədi rayonunda sudan qanunsuz istifadə halları aşkarlanıb. Bu haqda bu gün, 31 yanvar tarixində Bakuplus.az “Azərsu”ya istinadən xəbər verir.
Svetlana Məmmədova küçəsində fəaliyyət göstərən kafedə obyekt sahibi şəbəkəyə qoşularaq içməli su və kanalizasiya xidmətlərindən qanunsuz istifadə edib.
Həmin küçədə yerləşən dönər satışı obyektində də sahibkar texniki şərt almadan və müqavilə bağlamadan özbaşına çəkilmiş xətt vasitəsilə obyekti içməli su ilə təmin edib.
Sumqayıt şosesi, döngə 1 ünvanında yerləşən kafe, ət kəsimi və meyvə-tərəvəz satışı obyektlərində qeyri-qanuni çəkilmiş su xəttindən istifadənin qarşısı alınıb.
Binəqədi qəsəbəsi, DSK yolu, 1-ci mədən ərazisində fəaliyyət göstərən qum bazarında suyun talanması faktı aşkar edilib. Həmin əraziyə yaxınlıqdan keçən su kəmərindən xətt çəkilərək sudan sayğacdankənar istifadə olunub.
Ötən il içməli sudan qeyri-qanuni istifadə ilə bağlı Binəqədi rayonu üzrə 3071 fakt aşkarlanıb.
