Binəqədi rayonu, Binəqədi qəsəbəsi, 1-ci mədən, 8-ci korpus deyilən ərazidə xəstəlik mənbəyi yaranıb. Zibil ətrafa tökülür, üfunətdən nəfəs almaq mümkün deyil. Sakinlər tezliklə ərazinin zibildən təmizlənməsini, yeni məişət tullantıları qablarının qoyulmasını istəyirlər. Bu haqda bu gün, 31 mart tarixində Bakuplus.az ATV-yə istinadən məlumat verir.
Binəqədi qəsəbəsinin bələdiyyə sədrinin müavini Rəşad İsayev deyir ki, həmin ərazi onların balansında olmadığından təmizləmə işləri aparılmır. Digər tərəfdən antisanitar vəziyyətin yaranmasına səbəb elə sakinlərin özləridir. Bir qədər aralıda zibil qablarının olmasına baxmayaraq, sakinlər tənbəllikdən əraziyə getmək istəmirlər.
“Torpaq sahəsi Dövlət Əmlak Komitəsinə aid olduğuna görə bələdiyyənin inzibati ərazisində deyil. Təmizlənməsi üçün müəyyən qurumlara müraciət olunub. İnzibati əraziyə baxış keçirsəniz, görərsiniz ki, ərazinin sol və sağ tərəfində, yol kənarında məişət konteynerləri yerləşdirilib. Vətəndaşlar yaxın olsun deyə və yaxud yola çıxmasınlar deyə körpə uşaqları göndərirlər, bu poliqondan neçə illərdir ki, istifadə edirlər”, - deyə bələdiyyə nümayəndəsi bildirib.
Bununla belə Rəşad İsayev söz verdi ki, yenidən əraziyə baxış keçiriləcək. Yol kənarına zibil qablarının yerləşdirilməsi üçün tədbirlər görüləcək.
[caption id="attachment_95687" align="alignnone" width="640"]
Foto ATV[/caption]
