Bakıda bloger əməliyyat otağında çəkiliş edib. Söhbət "Baylarsoylar" adıyla tanınan bloqer Arifə Məmmədovadan gedir. Bloqer "Medipoint"adlı klinikada çox rahatlıqla süni mayalanma əməliyyatına girərək, cərrahın işini yaxından izləyib və əməliyyat otağındakı anları sosial şəbəkə hesabında izləyiciləriylə bölüşüb. Onun bu çəkilişi və paylaşımı ictimaiyyətdə ciddi müzakirələrə səbəb olub. Xüsusilə blogerlə yanaşı əməliyyat otağında çəkiliş edən başqa bir şəxsin də olduğu birmənalı qarşılanmayıb. Çox sayda insan bu addımı qeyri-etik, tibbə yaraşmayan qanunsuz addım kimi qiymətləndirib.
Qeyd edək ki, tibbi qaydalara və sanitariya-gigiyena normalarına görə əməliyyat otağına yad şəxsin daxil olması qadağandır. Xüsusilə əməliyyat otağına pasiyentin qohumları və dostları, media nümayəndələri və ya blogerlər, klinikaya aidiyyəti olmayan şəxslər, eləcə də reklam və ya sosial media məqsədilə çəkiliş edənlər daxil ola bilməz.
Səhiyyə Nazirliyinin və Əmək Məcəlləsinin müvafiq normativ sənədlərinə əsasən, xəstənin razılığı olmadan çəkiliş aparmaq, yaxud məlumat yaymaq şəxsi toxunulmazlıq və məxfilik hüquqlarının pozulması sayılır. Bu, inzibati və ya hətta cinayət məsuliyyəti ilə nəticələnə bilər.
Bəs, bloqerin bu addımı hüquqi məsuliyyət yaradacaq?
Tibb eksperti, professor Adil Qeybulla açıqlamasında sözügedən məsələnin qanun pozuntusu olduğunu qeyd edib:
"Bütün bu hallar qanunda xeyli boşluğun olduğunu göstərir. Bundan da bir çox şəxs sui-istifadə edir. Kənar şəxsin əməliyyat otağına məcburi texniki yardıma, tibbi avadanlığın xarab olması və s-yə görə, yaxud bir konsultantın, tibb işçisinin əməliyyata kömək üçün girməsi göstəriş əsasında mümkündür. Qalan bütün hallar qanunvericilikdə nəzərdə tutulmayıb".
"Tibb üçün iyrənc hal..."
Adil Qeybulla vurğulayıb ki, o şəxslərin məqsədləri reklam, korporativ maraqdır:
“Bu isə təbabət üçün iyrənc hadisədir. Biz onlara televiziya kanallarından, sosial şəbəkələrdən şahid oluruq. Bu halların qarşısı alınmalıdır. Təəssüf ki, bununla bağlı heç bir tədbir görülmür".
Bizim.media məsələylə bağlı Səhiyyə Nazirliyinin tabeliyində olan Analitik Ekspertiza Mərkəzinə sorğu ünvanlayıb.
Qurumdan bildirilib ki, Səhiyyə Nazirliyi Analitik Ekspertiza Mərkəzində yaradılmış işçi qrupu tərəfindən məsələ ciddi araşdırılacaq və müvafiq tədbirlər görüləcək.
