“Cəfər Cabbarlı” stansiyasının təmirinin növbəti mərhələsi başlanıb. Bu haqda BakuPlus.az bu gün, 6 may tarixində xəbər verir.
Bu mərhələ çərçivəsində stansiyanın yolunda və platformasında, vestibülündə əsaslı təmir işləri aparılacaq və işlər bir neçə hissədə təşkil olunacaq.
Qarşıdakı müddətdə təmir ardıcıllığını təmin etmək məqsədilə “Cəfər Cabbarlı” stansiyasının birinci yolu və platformasının, o cümlədən tunel geyimi və pilonların vəziyyəti qiymətləndirilərək tədbirlərin həcmi və miqyası müəyyən olunub.
Əsas vəzifələrdən biri sərnişinlərin “Xətai-Cəfər Cabbarlı” mənzili boyunca hərəkətinin məhdudlaşdırılmamasıdır. Bu səbəbdən stansiyanın ikinci yolu ilə “Cəfər Cabbarlı-Xətai” mənzili boyunca sərnişinlərin rahat istifadəsini təmin etmək məqsədilə vestibüldə işlər təmir prosesinin sonuncu hissəsində aparılacaq.
Ardıcıllığa uyğun olaraq, stansiyanın dəmiryolu infrastrukturunun tamamlama işləri məhz həmin müddətdə yekunlaşdırılacaq. Stansiya yolunun döşəməsi yenidən qurulacaq.
Yola bitişik platformanın, eləcə də “28 May” stansiyasına keçid tunelinin döşəmə örtüyü yararlı olduğundan, yalnız sıradan çıxmış üzlük daşları yenilənəcək.
Bu müddət ərzində stansiyanın bu hissəsindən “28 May” stansiyasının ikinci çıxışı istiqamətində olan keçidin döşəməaltı sahəsinin müvafiq qaydada təmiri də aparılacaq.
Sonuncu tədbirlər kimi vestibül və keçidlərdə tavan və döşəmə divarları, eskalatorların maili tunel geyimi, həmçinin xidməti otaqlarda əsaslı təmir tədbirləri yerinə yetiriləcək.
Hazırda burada və “28 May” stansiyası ilə bir sıra müştərək sahələrdə sağlamlaşdırma tədbirləri çərçivəsində yenidənqurma, gücləndirmə, korroziyadan təmizləmə, abadlaşdırma və s. işlər davam etdirilir.
