Bir neçə gün öncə burun əməliyyatından sonra vəfat edən Nəzrin Mansurovanın ölümü ilə bağlı cərrah Sənan Mehdiyev həbs olunub. Bu məsələ bir çox həkimləri sarsıdıb. Onlar həmkarlarının həbs olunmasına etiraz edərək, Sənan Mehdiyevə dəstək nümayiş etdiriblər.
Bu məsələ sosial şəbəkələrdə də geniş müzakirələrə səbəb oldu. Həkimi günahlandıranlarla yanaşı məyus olanlar da az olmayıb. Bildiriblər ki, heç bir həkim pasiyentinin ölümünü istəməz və s.
Bəs görəsən, hüquqi baxımdan həkim hansı halda həbs edilməlidir?
Mövzu ilə bağlı Bakuplus.az-a açıqlama verən hüquqşünas Ruslan Mustafazadənin sözlərinə görə, xəstənin hansı səbəbdən ölüm halının baş verməsi ilə bağlı müvafiq ekspertiza təyin olunur:
“Təbii ki, əməliyyat zamanı və ya müalicə prosesində xəstənin vəziyyətinin pisləşməsi, hətta ölüm ilə nəticələnməsi mümkündür. Bu səbəbdən müəyyən sənədlərə əvvəlcədən qol da çəkdirirlər. Ölüm halının olacağı təqdirdə razılıq sənədləri olur ki, şikayət olunmayacaq. Bu tip işlərdə qanunvericiliyin tələbi var. Xəstənin ağır xəsarətlər alması və yaxud da ölümlə nəticələnməsi ilə bağlı hallar olduğu təqdirdə müəyyən araşdırma aparılır, müvafiq ekspertiza təyin olunur.
Ekspertiza müəyyən etməlidir ki, ölümün səbəbi nədir. Əgər səbəb düzgün müalicənin aparılmaması və ya əməliyyatın düzgün həyata keçirilməməsidirsə, bu, həkimin səhlənkarlığı nəticəsində baş veribsə, təbii olaraq həmin həkim məsuliyyət daşıyır. Ekspertiza təyin edir ki, həkimin səhlənkarlığı olub və ya olmayıb. Ekspertiza həkimin məsuliyyətsiz yanaşdığını müəyyən etsə, həmin təqdirdə əlbəttə ki, həkim məsuliyyət daşıyır”.
R.Mustafazadə qeyd edib ki, klinikalar da bu kimi hallarda maddi məsuliyyət daşıyır:
“Belə hal müəyyən edildiyi təqdirdə klinikalar da maddi məsuliyyət daşıyır. Xəstənin yaxınlarının mülki iddia qaldıraraq dəymiş maddi və mədəni zərəri almaq hüquqları vardır”.
“Şəxs barədə cinayəti törətməkdə əsaslı şübhələr mövcuddursa, həmin şəxsin istintaqa təsir etmə, istintaqdan qaçıb gizlənmə və araşdırmaya maneçilik törətmə ehtimalları varsa, onun barəsində həbs qətimkan tədbiri seçilə bilər. Konkret bu işlə bağlı həbs qətimkan tədbirinin seçilməsi üçün hansı əsasların irəli sürülməsin bilmirik. Amma ümumən eyni əsaslar olur.
Düşünürəm ki, şəxs artıq uzun müddətdir həkimlik fəaliyyəti ilə məşğuldur və onun praktikasında ilk dəfədir belə hadisə baş verir. Məhz onun səhlənkarlığı nəticəsində ölüm hadisəsinin baş verib-vermədiyi ekspertiza keçirilmədən məlum olmadığı üçün onun barəsində həbs qətimkan tədbirinin seçilməsi bir qədər şübhəlidir. Hesab edirəm ki, şəxs barəsində alternativ qətimkan tədbirləri seçilə bilərdi”, - deyə R.Mustafazadə əlavə edib.
Nəzrin Vahid
