"OpenAI" dünya axtarış sistemləri bazarında "Google"u sıxışdıra bilər. Belə ki, artıq bütün istifadəçilər üçün "ChatGPT" çatbot vasitəsilə internet axtarışı funksiyası işə salınıb. Əvvəllər bu imkan yalnız ödənişli abunəçilər üçün mövcud idi.
Bildirilib ki, axtarışa daxil olmaq üçün xidmətin veb-versiyasında və ya mobil tətbiqdə qeydiyyatdan keçmək, daha sonra "ChatGPT"yə sorğu daxil etmək və "Axtar" düyməsini basmaq lazımdır. Bundan sonra çatbotdan daha ətraflı xülasə almaq və ya axtarışı dəqiqləşdirməyi xahiş etmək olar.
"ChatGPT Search" brauzerdə standart axtarış sistemi kimi təyin edilə bilər, həmçinin çatbot şifahi cavablar verə biləcək.
Maraqlıdır, "ChatGPT" günü-gündən genişləndirdiyi yeni funksiyaları ilə hansı texnologiyaları sıradan çıxaracaq?
Məsələ ilə bağlı Bakuplus.az-a açıqlama verən texnoloq Elvin Həsənov “ChatGPT" və bu kimi digər süni intellekt əsaslı çatbotların inkişafı və xüsusilə də internet axtarışı funksiyasının əlavə olunmasının bir çox ənənəvi texnologiyalara və xidmətlərə təsir edə biləcəyini vurğulayıb:
“Çünki süni intellektin bir deyil, bir neçə əsas istiqaməti var. Çatbotlar artıq yalnız mətn generasiya etməklə məhdudlaşmır. Eyni zamanda, istifadəçiyə daha dəqiq və kontekstə uyğun cavablar da təqdim edir. “Google”, “Bing” kimi ənənəvi axtarış sistemləri əsasən siyahılar və linklər təqdim edir. Amma "ChatGPT Search" kimi çatbotlar konkret cavablar və dərin analizlər təqdim edə bilir. Bu axtarış növü isə istifadəçinin vaxtına qənaət edir və nəticələri daha effektli edir.
Belə ki, “Wikipedia” və digər məzmun platformaları indiyə qədər əsas məlumat mənbələri idi. Amma "ChatGPT" yalnız faktları təqdim etmir, həm də məzmunu konkret sorğu tapşırığına uyğunlaşdırır. Məsələn, istifadəçiyə məlumatı xülasə edir, dərin analiz aparır və yaradıcı həllər təqdim edir.
Bununla yanaşı, çatbotlar fərdi tədris xidmətləri də təqdim edə bilir. Bu isə ənənəvi onlayn tədris resurslarının rolunu azalda bilər. Bu kimi nümunələr saymaqla bitməz həddədir. Düşünürəm ki, "ChatGPT" kimi süni intellekt həlləri ənənəvi xidmətləri sıradan çıxarmaqdansa, onları təkmilləşdirmək və daha effektiv etmək potensialına malikdir. Bu, istifadəçilərin həyatını asanlaşdırır, daha çox yaradıcı olmasına köməklik edir”.
Fidan İlqar
