Sakinlər Nizami rayonu, Özbəkistan küçəsi 9 ünvanında yerləşən ərazidə çirkab suların yola axdığını iddia edirlər.
Bununla bağlı Bakuplus.az-ın redaksiyasına şikayət ünvanlanıb.
Sakinlər üfunətdən dayana bilmədiklərini qeyd ediblər:
“Bu Sukanal İdarəsinin tabeliyində olan ərazidir. Ay ərzində demək olar ki, ən azı iki dəfə boru tutulur və nəticədə çirkab su yola axır, qoxusu isə ətraf binadakı sakinləri narahat edir.
Bununla yanaşı nəqliyyatın intensiv hərəkət etdiyi yol çirkab su ilə dolu olduğu üçün, piyadalar yolu keçməkdə çətinlik çəkir. Çirkab su insanların üstünə sıçrayır. Bu problemin kökündən həlli istiqamətində tədbir görülməsini xahiş edirik”.
Məsələ ilə bağlı İri Şəhərlərin Birləşmiş Su Təchizatı Xidmətinə sorğu ünvanladıq.
Bakuplus.az-ın sorğusuna cavab olaraq bildirilib ki, qeyd olunan ünvanda ötən gün tullantı su şəbəkəsində tutulma baş verib:
“Bu gün səhər saatlarında müvafiq rayon Sukanal idarəsinin qəza briqadası xəttin fəaliyyətini bərpa edib. Onu da diqqətə çatdıraq ki, adətən kanalizasiya tutulmalarına səbəb sakinlərin xətlərə müxtəlif məişət tullantılarını atmaları olur. Bu istiqamətdə belə halların baş verməməsi üçün sakinlərdən xahiş olunur ki, şəbəkəyə tullantı suyundan kənar əşyalar, məişət tullantıları atmasınlar. Tullantı su xətləri yalnız tullantı suyu axıtmaq üçündür”.
Nəzrin Vahid
